Numeros 21:4–9

Word:
“Ug kon ang hipaakan ug bitin motan-aw sa bitin nga bronsi, dili siya mamatay.” (v.9)

Reflection:

Nagbagulbol ug gikabsag pailob ang mga Israelitas, ilang gireklamo ang pagkaon ug ang panaw nga gihatag sa Diyos. Tungod sa ilang pagbagulbol ug walay pagpasalamat, sila gisilotan pinaagi sa mga bitin nga malala. Apan sa dihang sila naghinulsol ug nangayo kang Moises nga mag-ampo alang kanila, gipakita sa Diyos ang Iyang kaluoy. Dili sila direkta miduol sa Diyos, apan pinaagi kang Moises nga nag-intercede alang kanila. Kini nagapakita sa gahum sa pag-ampo sa pagpakiluoy o intercession, nga atong makita usab karon sa atong paghangyo sa mga santos ug labi na sa Inahan sa Dios, si Maria, nga mag-ampo alang kanato sa atubangan sa Diyos.

Ang tubag sa Diyos mao ang pagsugo kang Moises sa paghimo ug larawan sa bitin nga bronse ug ibayaw kini. Ang tanang napaakan nga motan-aw niini maluwas. Kini nagpamatuod nga ang paggamit sa larawan o imahe isip paagi nga magpahinomdom sa gahum sa Diyos dili idolatriya, apan usa ka paagi sa pagdala sa katawhan sa pagtuo. Sama niini, ang atong mga imahen sa simbahan nagatultol sa atong mga mata ug kasingkasing ngadto sa Ginoo nga mao ang tinubdan sa kaluwasan.

Kining tanan nagtudlo ngadto kang Kristo. Sama nga ang Israelitas maluwas pinaagi sa pagtan-aw sa bitin nga bronse, kita maluwas pinaagi sa pagtan-aw ug pagtuo kang Jesus nga gilansang sa krus. Ang kaluwasan dili gikan sa atong kusog, apan gikan sa pagtuo sa gahum ug kaluoy sa Diyos.

Life Application:

Ayaw kalimot sa pagpasalamat bisan sa lisod nga panahon.

Pag-ampo alang sa usag-usa, ug ayaw kahadlok mangayo ug tabang sa mga intercessors nga gipadala sa Diyos.

Tan-awa si Jesus pinaagi sa krus ug sa mga timaan nga nagdala kanato mas maduol Kaniya.

Prayer:

Ginoo, pasayloa kami kung usahay mareklamo kami sa imong mga panalangin. Tabangi kami nga mosalig sa imong gahum, ug tudlui kami nga magpasalamat sa mga intercessors nga imong gihatag aron mag-ampo alang kanamo. Uban ni Maria ug sa tanang santos, dalha kami kanunay kang Jesus nga among kaluwasan ug kinabuhi. Amen.